Voters ID nangabot na, Comelec magpatabang sa barangay

CEBU, Philippines - Magpatabang ang Commission on Elections sa mga barangay officials alang sa dali nga pag-apod-apod sa mga voters identification cards diha sa kabarangayan.

Si COMELEC-7 regional director Temy Lambino mibutyag nga nangabot na ang mga voters ID sa mga karaan ug bag-ong nagparehistro nga mga botante.

Hangtud karon, gamay pa gihapon kaayo sa mga botante ang nikuha sa ilang Comelec ID maong magpatabang na sila sa mga opisyal sa barangay.

Pagkakaron nag-imbentaryo ang Comelec kung si kinsa ang duna nay mga ID ug kadtong himoanan pa.

Dinhi sa syudad sa Sugbo, si North District Election Officer Atty. Marchel Sarno mitug-an nga ipapaskin nila sa mga barangay halls ang listahan sa mga pangalan sa mga botante nga may ID na. Tugutan usab nila ang barangay officials nga maoy mohatag sa mga ID ngadto sa ilang lumulopyo.

Gipahibawo usab ni Lambino nga mahimong masusi sa mga bag-ong botante ang status sa ilang ID pinaagi sa pagsusi sa www. comelec. gov. ph. (BANAT NEWS)