Basura nga dili segregated, dili na kuhaon

CEBU, Philippines - Ang mga opisyal sa dakbayan sa Sugbo nagkauyon nga sugod Marso 1 dili na hakuton sa mga garbage truck kadtong mga basura nga wala gi-segregate kon wala gilain pagsulod ang mga basura nga madugta ug dili madugta.

Kini nga kalamboan nauyonan sa mga opisyal sa kabarangayan ug mga sakop sa Solid Waste Management Board human sa seminar sa mga opisyal sa kabarangayan nga gihimo didto sa Cebu City Hall.

Giuyonan usab nga hingusgan ang pagpanakop sa mga tawo nga magpataka lang sa pagpanglabay og mga basura pinaagi sa mga sakop sa City Environment Sanitation Enforcement Team (CESET) ug sa Barangay Environmental Officers (BEO) sa kabarangayan.

Ang hepe sa General Service Office (GSO) nga si Engr. Rolly Ardoza miingon nga magsugod na usab sila paghimo og paspas nga information campaign aron pagpahibalo sa katawhan sa hugot nila nga kampanya.

Matud ni Ardoza dili na usab nila dawaton didto sa labayanan og mga basura ang mga garbage nga wala ma-segregate aron maleksyon ang mga tawo ug ang mga opisyal sa kabarangayan.

Ang mga barangay kapitan ug kadtong mga konsehal nga nagdumala sa committee on public services gipatawag kagahapon og tigum aron matudloan sila unsaon sa pagpatuman sa balaud.

Nasuta hinoon nga kapin lang sa 20 ka barangay kapitan ang mitambong kay ang uban kanila nagpadala ra og mga konsehal nga morepresentar kanila. Si Amancio Dongcoy, kawani sa Department of Environment and Natural Resources (DENR) ug sakop sa Cebu City Solid Waste Management Board, mi-lecture sa mga opisyal sa barangay kun unsay mahitabo kanila kun dili sila makapatuman sa balaod.

Gipasabot ni Dongcoy nga ang mga opisyal sa barangay, ilabi na gayud ang mga kapitan, mahimo sila nga mapasakaan og kaso paglapas sa Republic Act 9003, kon Ecological Solid Waste Management Act, sa higayon nga mapakyas sila pagpatuman sa balaud.

Dinhi sa dakbayan sa Sugbo may kapitan na kaniadto nga gikiha tungod kay wala makapatuman sa balaud ug hinoon nagtipun-og ang basura atubangan sa iyang balay.

Ang kawani sa DENR miingon nga susihon nila ngano nga gamay ra sa 80 ka kapitan sa barangay ang mitunga sa gipatawag nga seminar kagahapon.

Giangkon ni Dongcoy nga daghan pa kaayo nga barangay ang wala makapatuman sa balaud nga ilain gayud ang mga basura nga madugta ug kadtong dili madugta.

Matud ni Ardoza nga ang mga Barangay Environmental Officers (BEO) angay’ng idistino dinhi aron manakop sa mga magpataka’g labay sa ilang basura.

Pabor usab si Dongcoy nga ang mga BEO sa usa ka barangay adto idistino sa laing barangay aron dili sila magpangikog sa pagpatuman sa balaud. (BANAT NEWS)