Nakuryentihan, natagak sa building

CEBU, Philippines - Patay nang napalgan ang usa ka 19- anyos nga tinun-ang lalaki human gidudahang nakuryentihan ug natagak gikan sa ikaupat nga andana sa gipuy-ang building diha sa barangay Maribago, dakbayan sa Lapu-Lapu kagahapon sa kaadlawon.

Ang nakuryentihan patay mao si Jessie John Bayo Hermosilla, 19, residente sa maong dapit apan lumad sa barangay Ginakot  dakbayan sa Danao.

Matud pa ni PO2 Jerson Alparito sa Lapu-Lapu City Police Office,  uwahing nabantayan si Hermosilla alas- 2 pasado sa kaadlawon kagahapon nga naglabay og basura ug pagkahuman misulod og balik sa iyang lawak.

Paglabay sa pipila ka gutlo napugwat ang ig-agaw niini nga si Ivey Frieto tungod sa usa ka sipang buto gikan sa lawak ni Hermosilla maong gitawgan niya kini sa cellphone apan wala motubag.

Tungod niini, gisusi ni Frieto ang lawak ni Hermosilla apan wala kini sa sud maong midung-aw si Frieto sa bintana ug diha niya nakita ang ig-agaw sa ubos nga nag-ubo ug wala na maglihok.

Gisuwayan nila kini og dala sa tambalanan sa Mactan Doctors Hospital apan ang mga doktor mideklarar kaniya nga patay na.

Sa pagsusi sa lawas niini, duna kini mga paso sa iyang bukton ug dunay samad sa ulo nga gituohang inagian sa kuryenti.

Girekomendar sa kapolisan nga ipaubos sa autopsy ang patay’ng lawas ni Hermosilla aron masuta kung unsay hinungdan sa kamatayon sa biktima.  (BANAT NEWS)