Nanunggab ug mipatay sa silingan ikiha

CEBU, Philippines - Kaso nga murder gikatakda nga ipasaka sa kapolisan batok sa usa ka lalaki nga midunggab ug mipatay sa iyang silingan didto sa Barangay Pagsabungan, Mandaue kaniadtong Domingo sa udto. Ang kapolisan nag-andam na sa gikinahanglang dukomento aron masang-at na sa fiskaliya ang kaso batok ni Melbert Huerte  alyas Abay, 22, nga maoy suspek sa pagdunggab-patay ni Alexander Yap, 39, ug iyang silingan sa Pagsabungan.

Si SPO2 Danilo Barrita sa kapolisan sa Mandaue mitug-an nga ang biktima naglakaw lang pauli na unta sa ilang balay ug ang suspetsado nga iyang gikasugat kalit lang nanunggab sa walay igong hinungdan. Ang biktima nakaangkon og samad sa dughan. Ang suspek gikataho nga dali nga misibat pahilayo sa maong dapit ug wala na kini madakpi sa mga polis.

Matud sa maguwang sa biktima nga ang iyang manghod gidala unta sa Mandaue City Hospital apan gideklarar sa mga doktor nga patay na kini pag-abot sa tambalanan. Wala pa masayri kun unsay nasuk-an sa suspek nga gipatay man niya ang biktima nga iya ra nga silingan.   (BANAT NEWS)