Merkado sa Talisay baho ‘sab diay

CEBU, Philippines - Ang kagamhanan sa dakbayan sa Talisay nangita og paagi pagsulbad sa problema sa kabaho sa merkado sa Tabunok tungod sa pagkabarado sa tubig sa imbornal.

Si Konsehal Danny Caballero nga maoy tsirman sa committee on market sa konseho sa Talisay mibutyag nga aduna nay gihimong lakang ang siyudad sa pagsulbad sa maong problema.

Matud ni Caballero nga si Konsehal Socrates Fernandez nga maoy tsirman sa committee on infrastructure mipaabli sa culvert diha sa merkado ug gipalimpiyohan kini aron dili na mobara ang tubig.

Apan matud ni Caballero nga ang tawo nga gisangonan paglimpiyo sa kanal maglisud og sulod sa culvert tungod sa kadaghang tubig nga napundo nga hilabihan kabaho.

Ang mga opisyal sa Talisay nangita og paagi nga mahubas ang tubig pinaagi sa pagpasuyop niini apan kun mobundak na usab ang uwan mabara lang gihapon ang tubig.

Gibutyag ni Caballero nga misugyot na siya og resolusyon nga naghangyo sa Department of Public Works and Highways (DPWH) sa pag-rehabilitate sa kanal diha sa dalan Colis, likud sa merkado paingon sa Mananga.

Ang DPWH matud pa mibalibad kay ang mao nga kanal dili ilang proyekto kun dili, iya kini sa Talisay hinungdan nga ang maong ahensiya wala manginlabot sa maong problema.

Si Bise Mayor Romeo Villarante misugyot nga labing maayo nga ang dakbayan maghimo og temporaryong kanal nga ang hugaw gikan sa merkado adto ipaagos sa sapa sa Mananga.

Matud ni Villarante nga kun ang siyudad magsugod na pagtukod sa bag-ong merkado publiko sa Tabunok masulbad na unya ang problema sa kanal tungod kay lakip sa maong proyekto ang drainage system. (BANAT NEWS)