Massage Parlor gitulis sa 2 ka nag-helmet

CEBU, Philippines - Usa ka massage parlor sa Barangay Subangdaku, dakbayan sa Mandaue gitulis sa duha ka armadong tulisan nga nag-helmet alas dos ang takna kagahapon sa kaadlawon.

Matud ni PO2 Jessie James Galo sa Presento 5 sa Mandaue City Police Office (MCPO) nga wala maglisud ang duha ka tulisan kay ang Duke Spa nga nahimutang sa Hernan Cortes Avenue walay gwardya nga nagbantay.

Ang gitulis nga massage parlor nga gipanag-iya ni Jerry Lastimosa nakuhaan og mga P40 mil nga lainlaing butang, apil ang selpon nga gipanag-iya ni Joan Amicable, ang 27-anyos nga manager.

Matud sa mga nakasaksi nga ang duha ka tulisan yano ra nga misulod nga wala tangtanga ang ilang gisul-ob nga crash helmet sa dayon nila nga pagtulis.

Gisugilon sa biktima nga  gihurot og  hakop sa duha ka tulisan ang kuwarta nga diha sulod sa ilang kaha, dayon  yano ra  kaayo nga migawas  ug mipabulhot pagpadagan luwan sa ilang motorsiklo. (BANAT NEWS)