Nanglabni og selpon nadakpan dayon

CEBU, Philippines - Nadakpan dayon sa kapolisan ang 30-anyos nga lalaki human kini milabni sa selpon sa usa ka babaye didto sa Sitio Pulang-Bukid, Barangay Alang-Alang, dakbayan sa Mandaue lapas sa alas 11 kagahapon sa buntag.

Si Joey Tuston, taga dalan Tres Rosas, Barangay Alang-Alang, dakbayan sa Mandaue nadakpan ni P01 Rolin Santanez, polis nga nadistino sa Presinto 1 sa Mandaue City Police Office (MCPO).

Matud ni PO2 Earl Fomador nga ilang gipangita karon kadtong babaye nga gilabnihan sa iyang selpon kay wala pa man kini mopakita sa ilang buhatan aron mapasakaan og kaso ang dinakpan.

Si PO2 Fomador misaysay nga nag-atang og sakyanan ang biktima nga wala pa nila mahibaw-i ang ngalan ug nagsigi og text hangtod nga ang suspek miduol ug milabni sa iyang selpon.

Matud pa nga si PO1 Santanez nga nagpatrolya sa mao nga dapit naalarma pagsinggit sa biktima ug nakita nga gilabni ang cellphone sa maong babaye hinungdan nga abtik niya kini nga gigukod ug nadakpan.

Nabawi sa polis ang selpon sa biktima apan sa ilang pagbalik sa dapit nga nahitaboan sa paglabni wala na ang babaye.

Ang suspek matud pa miangkon nga natintal siya paglabni sa selpon sa babaye dihang iyang namatikdan nga taudtaud na kining nagpunay og text daplin sa karsada.

Matud ni PO2 Fomador nga kun dili mopakita ang babaye nga nabiktima sa pagpanglabi mabuhian nila ang dinakpan kun molapas na ang reglementary period sa iyang pagkasikop og dili pa siya mapasakaan og kaso. (BANAT NEWS)