Midaghan ang patay sa road accident sa Mandaue

CEBU, Philippines - Mas daghan ang nangamatay sa aksidente sa kadalanan sa dakbayan sa Mandaue sa tuig 2013 kun itandi kaniadtong 2012.

Hinuon, ang rekord sa Mandaue City Police Office (MCPO) nagpakita nga daghan ang gipasakaan og kaso sa hukmanan tungod sa kalapasan sa balaud sa trapiko.

Si SPO4 Apolinario Niez, chief investigator sa kapolisan sa Mandaue, miingon nga sa tuig 2012 ilang natala ang lima ka tawo nga namatay sa aksidente sa kadalanan apan sa miaging tuig miabot na og siyam ka tawo ang namatay.

Gitataw usab ni SPO4 Niez nga sa tuig 2013 nakapasaka lang sila og 38 ka kaso nga naglambigit og sakyanan nga minus ang gidaghanon sa 42 ka kaso nga ilang napasaka niadtong 2012.

Sagad sa mga kaso nga napasaka sa traffic division sa tuig 2012 naglambigit og mga reckless imprudence resulting to damage to properties; walo ka physical injuries; lima ka serious physical injuries; 11 ka reckless imprudence resulting to homicide; lima ka kaso nga driving without license; 10 ka kaso nga driving while under the influence of liquor ug usa ka attempted homicide, ug usa ka frustrated murder.

Ang kaso nga attempted homicide ug frustrated murder gipasaka batok sa duha ka drayber kay ang mga mireklamo mipasangil nga gituyo nga sila gipadam-agan unta aron mamatay.

Sa tuig 2013, ang MCPO traffic division nakapasaka usab og siyam ka reckless imprudence resulting to damage to property, 13 ka kaso nga naglambigit og physical injuries, pito ka reckless imprudence resulting to homicide; unom ang driving without license ug dunay usa ka tawo nga gikiha kay nag-drive og sakyanan nga wala’y lisensya.

Matud ni SPO4 Niez nga mahimo gayud nga kalikayan ang aksidente sa kadalanan kun mag-amping lang ang mga motorista ug ang katawhan ug motuman sa mga lagda.  (BANAT NEWS)