Citom mokuha’g daghang deputized agents

CEBU, Philippines - Ang City Traffic Operations Management (CITOM) mokuha’g dugang deputized agents gikan sa mga opisyal ug kawani sa kabarangayan sa dakbayan sa Sugbo.

Si Joy Tumulak, operations chief sa CITOM, miawhag sa mga opisyal sa Association of Barangay Councils (ABC), nga hangpon sa CITOM kun makahatag sila’g bisan ta’g 10 ka volunteer enforcers sa matag barangay.

Gihimo ni Tumulak ang awhag nga motabang ang mga opisyal ug kawani sa kabarangayan sa kampanya pagsumpo sa badlungong drayber human siya mipasabot kanila nga nagkagrabe na karon ang problema sa trapiko dinhi sa dakbayan.

Matud ni Tumulak nga kaniadto ang grabeng problema kabahin sa paghuot sa sakyanan diha sa kadalanan mahitabo lang gikan sa buntag sayo ngadto sa alas nueve sa buntag, ug alas kwatro sa hapon ngadto sa gabii.

Apan si Tumulak mipasabot nga pagka karon hapit tanang oras maghuot na ang mga karsada sa sakyanan.

Base sa rekord ang Central Visayas adunay kapin sa 624,000 ka sakyanan nga narehestro sa Land Transportation Office (LTO) ug kadaghanan ania sa Sugbo magdagan-dagan.

Gawas sa mga sakyanan nga dinhi sa LTO-Region 7 marehestro, daghan pa nga sakyanan nga narehestro sa laing mga rehiyon nga ania magdaganan sa dakbayan.

Nahibaw-an nga matag tuig adunay kapin sa 20,000 ka bag-ong sakyanan ang madugang sa mga sakyanan dinhi lang sa Rehiyon-7.