Upat gipamusil, duha patay
CEBU, Philippines - Duha ang patay samtang duha usab ang naangol sa nahitabong pagpamusil sa barangay Nangka sa lungsod sa Balamban pasado alas-onse sa milabay’ng gabii.
Si PO1 Bryle Villaba, desk officer sa Balamban Police Station sa pakighinabi sa Banat News sa telepono miingon nga dead on the spot si Ernel Bucag, 21, residente sa nahitaboan ug namatay usab si Rey To-ong, 20.
Si To-ong giingong nabugtoan sa iyang kinabuhi samtang gibiyahe padung sa Vicente Sotto Memorial Medical Center matud pang Villaba base sa impormasyong gibutyag kaniya sa iyang kaubanan.
Ang mga gidala sa VSMMC mao sila si Clint Estan, 24, ug ig-agaw niini nga si Rhembran Estan, 19, gumikan sa mga samad pinusilan sa ilang kalawasan.
Sumala pa ni Villaba, nag-estambay ang mga biktima sa usa ka tambayanan sa maong barangay nianang gabii ug padung na unta manglakaw dihang usa ka motorsiklo nga dunay duha ka mga lalaking sakay ang mihunong sa ilang tungod. Apan base sa impormasyong nadawat sa Banat News, giingong nagduwa og bulitsi ang mga biktima sa dihang nangabot ang mga mamumuno.
Ang backrider niini kalit nga mipaulan kanila og bala hinungdan sa pagkaigo sa mga biktima. Human sa pagpamusil miikyas ang mga gikatahapan padung sa direksyon sa lungsod sa Asturias.
Daling gidala sa Balamban District Hospital ang upat apan patay na si Bucag samtang daling gibalhin ang tulo sa VSMMC sa Cebu City apan namatay ang usa kanila samtang gibiyahe.
Gisuwayan unta pagtawag sa Banat News si Chief Insp. Richard Oliver, hepe sa maong police station ug ang imbestigador sa maong kaso nga si SPO1 Jose Villarino aron pagkuha og dugang impormasyon ug kung unsay posibleng motibo sa maong pagpamusil apan walay mitubag sa ilang mga cellphones. (BANAT NEWS)
- Latest
