Goon sa politiko sa dumanjug nga nakaeskapo nadakpan

CEBU, Philippines - Samtang nasikop sa kapolisan sa lungsod sa Maasim sa Sarangani Province ang giilang most wanted person ug pugante sa lungsod sa Dumanjug niadtong Huwebes pasado  ala 1:00 sa hapon atol sa manhunt operation didto sa Purok Baang, barangay Colon, Maasim.

Si Maasim Police deputy station commander Insp. Maria Odisa Rendaje miila sa dinakpan nga  mao si Leomar Angana, alyas Leo, 25, taga barangay Kandabong lungsod sa Dumanjug.

Sa interbyu sa Brigada News FM General Santos City, si Rendaje miingon nga ang hepe sa kapolisan sa lungsod sa Dumanjug nga si Sr. Insp. Cesar Garcia Misula Jr. maoy mihatag kanila og impormasyon kabahin sa suspek diha sa ilang lugar. Si Angana  miinsister nga nasaypan lang siya apan ang mga patik niini sa lawas maoy nagtug-an kung si kinsa siya tungod kay nakahibawo ang kapolisan sa mga patik niini.

Usa si Angana sa lima ka   armadong tawo nga giingong mga goons sa usa ka politiko nga gidakop sa kapolisan sa Dumanjug niadtong Abril 6, 2013 tungod sa paghupot og mga tag-as nga mga armas ug eksplosibo.

Kauban ni Angana nga nadakpan sa miaging tuig mao sila si Bobby de la Cerna, 24; George Angana, (ig-agaw ni Leomar), 37; Roel Gutana, 22; ug Jimmy de la Cerna, 19.

Apan niadtong Abril 15, 2013 nakapuga kini sa selda human niya gibawog ang puthaw nga rehas, nikatkat sa manhole padulong sa pansayan sa Dumanjug Police Station ug nakaikyas.

Gikatakda siyang ibalik dinhi sa Sugbu sa mosunod nga mga adlaw. (/EIM)(BANAT NEWS)