Polis nga gilambigit sa kamatayon sa negosyante nibutho sa PRO-7

CEBU, Philippines - Mipatim-aw na sa Regional Investigation and Detective Management Division kagahapong adlawa ang kontrobersyal nga polis nga si SPO3 Jonas Paquibot aron sa pagtubag sa kasong administratiba nga gipasaka batok kaniya.

Si Paquibot ang gitumbok nga polis nga usa sa mikuha sa negosyante nga si Jerome Bendebel sa lungsod sa Balamban niadtong kaadlawon sa Enero 1, 2014 aron ihatod unta sa usa ka rehabilitation center sa dakbayan sa Sugbo.

Apan patay na kini nga nahidangat sa Perpetual Soccour Hospital ug nasuta nga naputos sa bun-og ang patay nga lawas niini.

Si Paquibot wa magpa-interbyu sa mga tigbalita kay adto na siya motubag kun duna nay kaso nga ipasaka batok kaniya.

Ang abogado ni Paquibot nga si Atty. Kevin Palacio miingon nga unfair alang sa iyang kliyente nga motubag sa kasong administratiba tungod kay wala silay nadawat nga reklamo.

Si Sr. Supt. Armando Radoc ang hepe sa RIDMD miingon nga nasurpresa siya sa pagbutho ni Paquibot tungod kay nakadawat na siya sa tubag niini nga mibalibad sa iyang imbitasyon.

Gipahinumduman ni Radoc si Paquibot nga kabahin siya sa organisasyon sa kapolisan.

“Disrespect is that what you call it? It’s more than that,” sumala pa ni Radoc. Busa mihukom si Radoc nga ipadayon ang imbestigasyon sa kasong administratiba batok ni Paquibot bisan pa og dili siya mokooperar. (/EIM)(BANAT NEWS)