Bag-ong pamaagi paglukat og lisensya sa armas di paglisod-lisod
CEBU, Philippines - Ang hepe sa Firearms and Explosives Office sa kapolisan sa nasud Chief Supt. Louie Oppus mipasabot nga dili tumong sa bag-ong pamaagi paglukat og lisensya sa armas nga lisod-lisoron ang mga nanag-iya niini.
Matud pa ni Oppus nga ubos sa Republic Act 10591 o ang Comprehensive Firearms and Ammunition Regulation Act nagtinguha nga mas mapadali ang pagkuha og lisensya aron makaangkon og armas ang usa ka tawo.
Kini tungod kay gihimo nga sayon ang pamaagi sa pagkuha og lisensya sa armas apan matud pa niini nga dunay kabag-ohan nga ipatuman sigun sa gimbut-an sa maong balaod.
Sumala ni Oppus nga sa bag-ong balaod ang tag-iya mismo ang molukat sa lisensya nga gitawag og License to Own and Possess ug gilimitahan lang sila sa duha ka mugbo nga armas.
Ang small arms kadtong mga armas nga dili mga automatic ug mga “single burst†nga armas. Gibag-o na sab ang klasipikasyon sa armas ngadto na lang sa small arms ug light arms base sa international community.
Sumala pa ni Oppus nga kinahanglan nga kompletohon lang sa mga gusto nga molukat og lisensya ang iyang papeles aron dili kini ma-reject.
Lakip sa dukomento nga gikinahanglan mao ang drug test nga diha sa PNP Crime Laboratory Service 7 lang makuha ug neuropsychological exam sa Regional Health Services 7 alang sa rehiyon siyete.
Mahimo maka-apply niini pinaagi sa internet ug mahibaw-an dayon kung giaprubahan ba o wala ang aplikasyon pinaagi sa automatic confirmation sa text ug mandoan sila nga mobayad sa bangko sa ilang mga balayrunon una pa ipadala pinaagi sa koreyo ang ilang lisensya sa armas.
Matud pa ni Oppus giusab ang proseso aron malikayan na ang mga ‘fictitious’ nga mga address ug pangalan sa nanglukat og lisensya nga ning bag-ohay lang nadiskubrehan tungod sa pag-verify sa mga address niadtong wala na mo-renew.
Niadtong bulan sa Enero ning tuiga, giaprubahan ni Presidente Benigno Aquino III ang gun amnesty program sud sa unom ka buwan alang sa mga nanag-iya og loose firearms aron mahatagan sila og kahigayonan nga ma-renew ilang mga firearm licenses. (/EIM)(BANAT NEWS)
- Latest
