Tulo ka tinun-an patay sa awto
CEBU, Philippines - Patay ang tulo ka tinun-an ug angol ang laing tulo human sila naligsan samtang naglakaw daplin sa dalan gikan sa eskuylahan padulong sa ilang tagsa-tagsa ka balay pasado alas- 4 sa miaging hapon didto sa barangay Poblacion, Boljoon.
Namatay paglabay sa pipila ka minuto paghidangat sa Boljoon Health Center si Judy Ann Lomera, 18, samtang didto namatay sa Chong Hua Hospital sila si Cristy Marie Estella, 18, ug Joan Marie Romero, 16, pulos mga tinun-an sa Boljoon National High School.
Ang drayber sa awto nga nakabangga kanila mao si Al-Dhinier Hadjula Sanaani, 26, medical representative, taga dalan Visitacion, barangay Sambag 2 sa dakbayan sa Sugbo.
Samtang angol usab sila si Nice Ancheta, 15, Melissa Mendez, 14 ug si Kynth Marie Mendez nga nalandig sa Chong Hua Hospital.
Naangol usab ang kauban ni Sanaani nga si Kristine Joyce Batucan, 26, taga dalan Tuscaña, Guadalupe.
Matud pa sa hepe sa kapolisan sa lungsod sa Boljoon nga si Insp. Dexter Basirgo nga ang Toyota Vios Sedan nga may plate number TCQ 652 nga gimaneho ni Sanaani ang nakabangga sa mga biktima.
Nagduda si Basirgo nga posible nga nakatagpilaw si Sanaani hinungdan nga mitipas ang sakyanan sa wala nga lane ug nadasmagan ang mga tinun-an. Tungod sa kakusog sa pagdasmag nangalagpot ang mga biktima sa sapa nga may giladmon nga 12 ngadto sa 15 metros samtang si Kynth Marie Mendez napasok sa ilawom sa awto.
Matud pa sa inahan ni Kynth Marie nga si Marciana Mendez nga wala hinuon siya nasuko kang Sanaani tungod kay di man gyud matag-an ang disgrasya ug wala na siyay plano nga pasakaan kini og kaso. Luwas na hinuon sa makuyaw nga kahimtang si Kynth Marie Mendez nga kaduha na gipaubos sa operasyon ug posible nga operahan na sab kini sa iyang kamot sa Domingo o ba kaha sa Lunes apan nagpabilin sa intensive care unit. (/EIM)(BANAT NEWS)
- Latest
