Buhatanan og fake driver’s license gironda

CEBU, Philippines - Gironda sa hiniusang pwersa sa Cebu City Police Office, Mandaue City Police Office ug Lapu-Lapu City Police Office  ang usa ka buhatanan og mga peke nga driver’s license sa dalan Colon, dakbayan sa Sugbo kagahapon.

Matud pa ni Chief. Insp. Romeo Santander,  hepe sa City Intelligence Branch sa Cebu City Police Office, ang maong establisamento gipanag-iya ni Penny Ursa.

Miingon si Santander nga nasikop sab nila atol sa maong raid ang duha ka trabahante niini nga si Jasper Lauron, 22, taga Valladolid, dakbayan sa Carcar ug  Debie Carpentero, 19, taga barangay Bulacao,   dakbayan sa Sugbo.

Matud pa ni Santander nga si Ursa nagnegosyo og ID picture apan dunay nisumbong kanila nga nanghimo usab kini og peke nga lisensya.

Matud pa ni Santander nga migamit sila og police decoy ug mi-order og drivers license sa Land Transportation Office sa maong ID shop. Dihang gitunol na  ang gipalit nga driver’s license gidakop dayon sila sa kapolisan.

Gikompiskar sa kapolisan ang  kagamitan sa maong ID shop lakip sa computer monitor, CPU nga gigamit niini sa paghimo sa peke nga ID.

Matud pa ni Santander nga gihimo nila ang maong operasyon dihang may nalambigit og aksidente sa dakbayan sa Lapu-Lapu ug nasuta nga peke ang lisensya sa drayber ug mitug-an kining gipalit niya kini sa dakbayan sa Mandaue apan ilang nasubay nga naggikan diay ang maong fake license sa shop ni Ursa. Nasuta nga usa ka Nigerian national nga si Yusuk Abubakar, 25, ang naaksidente sa Lapu-Lapu City niadtong Miyerkules apan mireklamo ngadto sa CIB -MCPO nga peke ang driver’s license nga iyang nakuha gikan sa buhatan sa Land Transportation Office sa dakbayan sa Mandaue.

Apan nasuta sa imbestigasyon nga napalit diay ni Abubakar   ang nahisgutang pekeng lisensya sa mga “fixers” nga nag-alirong sa nahisgutang buhatan.

Matud  ni Abubakar nga niadtong Enero 17 miadto siya sa LTO Mandaue aron molukat og driver’s license ug gani iyang gikalipay nga usa ka adlaw ra niya kining nakuha human makabayad og kuwatro mil pesos.

Nasuta  sa imbestigasyon nga wa moagi og transakyon sud sa LTO-Mandaue si Abubakar kay gisugat kini sa mga fixers nga babaye ug lalaki.

Si Supt. Josefino Ligan, hepe sa CIB, nagkanayon nga ila nang gitambagan  ang Nigerian nga ikiha og kasong estafa ang nahisgutang mga fixers nga gipugngan ra usa ang mga ngalan. (BANAT NEWS)