Mga bugas nga hinabang naabot na

CEBU, Philippines - Usa ka barko nga mga bugas-humay gikan sa China nga alang sa mga biktima sa bagyo’ng Yolanda ug linog sa Bohol miabut sa pantalan sa dakbayan sa Sugbo kaniadtong Miyerkules.

Ang kadagkoan sa National Food Authority (NFA)-7 mitug-an nga mga 800 metric tons ang mga bugas nga gihatag sa China aron itabang sa mga biktima sa bagyo.

Ang NFA-7 pinaagi sa tigpamaba niini nga si Lucy Rosales mipahibalo nga ang maong mga bugas nga gidonar sa China gitugyan dayon kanila human nakadunggo ang barko.

Apan giklaro ni Rosales nga ang maong mga bugas dili kay alang ra sa mga biktima sa bagyong Yolanda sa amihanang kalungsuran sa Sugbo, Leyte ug ubang bahin sa Kabisay-an kun dili apil usab kini sa mga biktima sa ubang kalamidad sama sa linog didto sa Bohol.

Matud ni Rosales nga ang ilang buhatan wala pa mahibalo kun pila ka sakong bugas ang para sa mga biktima sa bagyo dinhi sa Sugbo ug pila usab ang alang sa mga biktima sa linog sa Bohol ug sa ubang kalamidad sa laing probinsiya. Si Rosales miingon nga nagpaabut pa sila og kamanduan gikan sa labaw nga buhatan sa kaulohan.  (BANAT NEWS)