Ex-con nadakpan nakuhaan og armas

CEBU, Philippines - Nasikop sa mga sakop sa PNP Regional Public Safety Company ang usa ka ex-convict atol sa checkpoint nga gihimo kagahapon sa kaadlawon sa barangay Guadalupe, dakbayan sa Carcar.

Ang dinakpan nga si Charles Sabala, 36, nakuhaan og armas ug ilegal nga drugas.

Matud ni Insp. Irvin Bellen ang commanding officer sa RPSC nga ang dinakpan molupyo sa sitio Liburon, barangay Guadalupe sa maong dakbayan.

Si Bellen miingon nga nasigpatan nila si Sabala luwan sa usa ka motorsiklo ug dihang ilang gipara ug gipangitaan og lisensya wala kini makapakita niini. Nabantayan usab ni Bellen nga dunay gikumkom sa iyang kamot si Sabala mao nga ila kining gisusi ug nakit-an ang unom ka paketeng shabu.

Gawas sa ilegal nga drugas nakuhaan usab si Sabala og usa ka kalibre .22 nga magnum revolver nga may tulo ka bala ug wala say papeles nga napakita alang sa legal niyang pagdala-dala.

Pamultahon ang dinakpan tungod sa pagmaneho’g motorsiklo nga walay lisensya ug pasakaan og kaso paglapas sa Republic Act 10591 kon Comprehensive Law on Firearms and Ammunition, ug laing kalapasan sa Sec 11 sa Comprehensive Dangerous Drugs Act. (BANAT NEWS)