Nanulis gamit ang blade

CEBU, Philippines - Batan-ong babaye misukol sa mikawat sa iyang kwarta gikan sa iyang gidala nga bag apan napugos kini pagtugyan na lang dihang gihulga siya sa suspek nga laslason ang iyang nawong sa gigunitan niini nga hait kaayo’ng “blade.”

Si Lucia Razon misakay og PUJ gikan sa dalan Colon apan iyang naalinggatan nga gilaslas sa iyang katupad nga pasahero ang gidala niya nga bag ug nakuha na ang P2,450.

Matud ni Razon nga gigunitan dayon niya ang kwarta aron iya kining mabawi apan gihulga siya sa kawatan nga kadlitan sa “blade” ang iyang nawong. Ang kawatan midali sa pag-ambak gikan sa PUJ apan nadakpan kini sa mga tanod nga nagpatrolya. Ang suspek giila sa kapolisan nga si Richard Juntilla, 44, ug lumad nga taga Davao del Sur. Matud sa kapolisan nga ang kwarta sa biktima nakuha pagbalik gikan sa suspek. Dugang mga “blade” nakuha gikan sa bulsa sa dinakpan nga giandaman na og kaso.

Samtang nadakpan sa kapolisan kaniadtong Martes ang usa ka gwardya nga gipasanginlan og pagpanglugos sa usa ka menor de-edad nga iyang pag-umangkon.

Ang ngalan sa gwardya gipugngan lang sa Banat News sanglit iyang pag-umangkon ang biktima. Ang gwardya gidakop sa mga polis basi sa warrant of arrest nga giluwatan ni Judge Olegario Sarmiento sa Regional Trial Court (RTC).

 Ang sayes-anyos nga biktima gilugos sa gwardya kaniadtong Hulyo 1, 2009 didto sa ilang balay sa Barangay Tangke, Talisay.

Human sa pagpanglugos ang gwardya milarga ngadto sa Dakbayan sa Ozamis, Mindanao ug mibalik sa Talisay kaniadto lang Disiyembre.

Ang dinakpan gibilanggo na sa Talisay City Jail ug walay piyansa nga girekomendar alang sa iyang temporaryo nga kagawasan.  (BANAT NEWS)