TCC president mihangyo kang Cañete nga maghuwat

CEBU, Philippines - Ang presidente sa Talisay City College nga si Richel Bacaltos mihangyo kang Dr. Paulus Marie Cañete nga maghuwat sa tukmang panahon sa iyang paglingkod isip presidente sa TCC.

Kahinumduman nga si Cañete gipalingkod ni Mayor Johnny de los Reyes sa TCC pinasikad sa executive order nga iyang giluwatan. Ang mayor maoy tsirman sa Board of Trustees (BOT) sa maong eskuylahan.

Ang lakang sa mayor gihulagway ni Bise Mayor Romeo Villarante nga illegal ug premature kay wala kini resolusyon gikan sa BOT.

Kagahapon sa buntag ang staff ni Cañete nga si Dr. Elmer Ripalda nagpahiluna na og mga lingkuranan ug lamesa ngadto sa industrial building sa TCC tungod kay giingong adto mag-opisina si Cañete.

Si Ripalda nga nahinabi sa mga tigbaliga kagahapon nagkanayon nga igo ra siyang gisugo ni Cañete tungod kay adto kini mag-opisina.

Gipasabot ni Ripalda nga ubos sa executive order sa mayor si Cañete giinstolar na isip officer-in-charge (OIC) president sa TCC.

Matud ni Ripalda nga atol sa napahigayong meeting tali sa BOT dunay nabutang sa minutes kabahin sa paghatag og authority sa mayor sa pagpili og bag-ong presidente sa TCC.

Ang minutes matud usab ni Ripalda dunay gibug-aton kun itandi sa resolusyon.  Si Bacaltos sa iyang bahin, mihangyo kang Cañete nga maghuwat sa panahon aron siya pormal nga ma-instolar isip presidente sa TCC aron wala’y mahitabong kasamok.

Matud niya ang mga estudyante maoy maapektuhan tungod kay maglibog na unya kini kung duha ka presidente ang mulingkod sa TCC.

Giklaro ni Bacaltos nga base sa iyang kontrata isip presidente sa TCC, hatagan siya og 30 ka adlaw una pa siya mobiya sa pwesto aron mapahigayon ang pormal nga turnover sa mopuling presidente.

“We have to study our options, ang ilang action kagahapon (Martes) was very insulting they came here and went around room to room and introduced themselves that was illegal,” butyag ni Bacaltos.

Gipasabot ni Bacaltos nga wala siya mosupak sa kamanduan sa mayor apan kinahanglang ipasubay usab sa tukmang paagi.       

Si Kongresista Gerald Anthony “Samsam” Gullas, Jr. sa unang distrito sa probinsiya nagkanayon nga  nabalaka siya sa lakang ni De los Reyes nga gipaagi lang og executive order. Si Gullas kinsa honorary chairman sa TCC ug dunay voting power sa board nagkanayon nga nakugang siya sa gihimong aksiyon sa mayor tungod kay wala niini gisunod ang legal nga proseso ug wala usab mosubay sa ordinansa.

“Talisay City College is no one man rule. He cannot appoint or install just because he is the mayor,” matud ni Gullas.

Si Gullas nagkanayon nga kung ang mayor dili makahibawong mosunod sa ordinansa sa City College buot pasabot dili usab kini kahibalong mosunod sa “law of the land” ilabi na sa dakbayan sa Talisay. (BANAT NEWS)