Nasaypang target gipatay

CEBU, Philippines - Patay ang usa ka mag-uuma nga gipusil sa lima ka higayon sa tulo ka wa mailhing tawo human kini nasaypan nga mao ang ilang target diha sa Sitio Upper Ana, barangay  Bulasa, Argao sa alas 4:40 niadtong Martes sa hapon.

Ang biktima naila nga si Bienvenido  Labrador Sr., 60, molupyo sa samang lugar.

  Si PO2 Renato Nacaytuna,   miingon nga miabot ang tulo ka tawo sa balay ni Jovencio Sarno Sr. ug gipangutana ang pag-umangkon niining si Jovencio Jr. kung asa ang iyang amahan.

Mibalos og pangutana si Jovencio Jr. ngadto kanila ug miingon "ngano man diay?" Apan nakurat na lang si Junior nga gitionan siya ug armas ug giingnan nga "ay’g saba."  Paglabay sa pipila ka gutlo, niabot ang biktima nga naglukdo og mais.

Pagkakita sa mga suspetsado, ang usa miingon "mao na ni" ug diha-diha gitabangan nila pagpusil ang biktima nga naigo sa nawong ug lawas.

Human sa pagpamusil daling nanakay og motor ang mga killers ug mipasirit palayo. Gisuwayan pagdala sa mga kabanay ang samaron sa Isidro Kintanar Memorial Hospital apan patay na pag-abot.

Sumala pa ni Nacaytuna nga nasaypan sa mga mamumuno ang biktima nga mao ang igsuon niini nga si Jovencio Sr., ang amahan sa batan-ong unang gipangutana ug gitionan og armas sa mga gikatahapan.

“Nasaypan ra ni siya, nagbangot man gud sa iyang nawong, abi og iyang igsuon,” sumala pa ni Nacaytuna kinsa nagdudang mga gun-for-hires ang mga mamumuno. Gidudahang bangi sa yuta ang hinungdan sa maong pagpatay. (BANAT NEWS)