CITOM collection miusbaw

CEBU, Philippines - Misaka ang koleksyon sa Cebu City Traffic Operations Management (CITOM) kaniadtong buwan sa Disiyembre, matud ni Sofia Bacolod nga maoy hepe sa Traffic Violations Bureau (TVB).

Matud ni Bacolod nga misaka ngadto sa P4,730,154 ang ilang nakolekta sa buwan sa Disiyembre kun itandi sa P4,357,120 sa buwan sa Nobiyembre kaniadtong miaging tuig.

Ang rekord nagpakita nga daghang drayber ang nadakpan sa kalapasan sa lagda sa tukma’ng pagmaneho og sakyanan kay ang administrative fines miusbaw gikan sa P538,930 sa Nobiyembre ngadto na sa P735,809 sa Disiyembre.

Apan nasuta nga ang labing dakung koleksyon sa CITOM gikan gayud sa bayad sa mga motorista nga miparking sa ilang mga sakyanan sa gideklarar nga parking area.

Ang CITOM adunay dul-an sa 300 ka traffic enforcers nga gitahasan sa pagmentinar sa kahapsay sa trapiko ug pagdakup sa mga masalaypong drayber.  (BANAT NEWS)