Opisyal sa TEAM nangatarungan
CEBU, Philippines - Gipanghimakak sa kadagkoan sa Traffic Enforcement Agency of Mandaue (TEAM) ang reklamo nga wala nila tagda ang awhag nga butangan og lugar ang dalan Plaridel sa Barangay Cambaro aron anha makahunong ug makapakanaug og pasahero ang mga sakyanan.
Adunay mireklamo sa Banat News pinaagi sa “Mr. Barangay†ni Jun Veliganio nga wala gayud mahuna-huna sa TEAM ang pagbutang og lugar sa dalan Plaridel nga anha makahunong ang mga sakyanan ug makasakay ang mga pasahero.
Si TEAM executive officer Edwin Ermac miingon nga nalangan lang ang pagbutang dayon og “Stopping ug Unloading†area kay nagpangita pa sila og lugar nga magamit aron adto magpundo ang mga pasahero nga magpaabot og sakyanan paingon sa Lapu-Lapu ug kalungsoran sa amihanang Sugbo.
Matud ni Ermac nga adunay tag-iya og yuta sa maong dapit nga andam mopagamit og kabahin sa iyang luna aron gamiton nga kahunongan sa mga PUJ ug kapundohan ‘sab sa mga sumasakay.
Gipasabot ni Ermac nga dili mahimo nga butangan lang dayon og PUJ stop ug unloading signs ang maong dapit kay makabalda kini sa pag-agi sa ubang sakyanan.
Si Ermac miingon nga ang dalan Plaridel gikan sa Ouano Avenue atubangan sa Mandaue City Sports and Cultural Complex daan na nga nakasinati og panaghuot sa mga sakyanan panahon sa buntag ug hapon paingon na sagabii.
“Kun atong patakaan og butang og jeepney stop diha kay maoy reklamo sa mga pasahero makamugna na ‘sab og laing problema,†matud ni Ermac.
Midugang si Ermac nga dili madali-dali ang pagbutang og jeepney stop ug unloading area sa mao nga karsada kay kinahanglan pa nga mananghid sa Department of Public Works and Highway (DPWH) sanglit ang maong karsada usa ka national road.
Gani miingon si Ermac nga nalipay kaayo siya nga misanong sa ilang paghangyo ang tag-iya sa yuta sa maong dapit nga gamiton nila kini nga jeepney stop ug unloading area aron dili makabalda sa ubang sakyanan. (BANAT NEWS)
- Latest
- Trending
