Mangunguot sa mga pasahero sa PUJ nadakpan

CEBU, Philippines - Pwerte’ng bun-oga sa usa ka tawo human kini gitabangan og kulata sa mga “bugoy” kay giingong nadakpan nga nanguot luwan sa usa ka passenger jeepney didto sa Barangay Banilad, Mandaue kaniadtong Lunes sa gabii.

Si Michael Libres Acuña, 25, minyo nga taga Barangay Pasil, dakbayan sa Sugbo nadakpan human nga matud pa mikuot sa mahalong selpon ni Precious Grace Felicidad Gandia.

Ang 16-anyos nga biktima nga taga Nasipit, Talamban tinun-an sa University of Cebu-Mandaue-Lapu-Lapu (UCLM) paingon unta sa Barangay Centro gikan sa usa ka mall dihang gikuot ang iyang selpon. Ang biktima nga nakabantay sa pagkuot sa iyang selpon abtik kaayo nga migunit sa kamot sa suspetsado nga padulong na unta nga manaug sa PUJ nga ilang gisakyan.

Ang mga tawo nga nakadungog sa pagsinggit ug pagpangayo’g tabang sa biktima dali nga miduol ug gitabangan nila’g kulata si Acuña mao nga nakaangkon kini’g daghang bun-og.

Si PO1 Jessie James Galo sa presento 2 sa Mandaue City Police Office (MCPO) miingon nga kuhaan nila’g pamahayag ang biktima aron gamiton pagpasaka og kaso sa suspek. (BANAT NEWS)