Kampanya batok illegal parking

CEBU, Philippines - Mga sakop sa Cebu City Traffic Operations Ma-nagement (CITOM) mihingusog sa ilang paghimo’g kampanya batok sa mga sakyanan nga ipataka lang og parking diha sa mga aseras sa dakbayan sa Sugbo.

Si Joy Tumulak nga maoy operations officer sa CITOM mitambag sa mga motorista nga dili gayud ipataka og parking ang ilang mga sakyanan kay aron dili sila maisyuhan og Traffic Citation Tickets.

Daghang mga motorista ang mobaliwala ra sa TCT nga iisyu sa mga traffic enforcers kanila kay dili man sakmiton ang ilang mga driver’s license, apan si Tumulak mipasabot nga magtipun-og ang ilang kalapasan nga matala sa Traffic Violations Bureau (TVB).

Kadtong mga sakyanan, ilabi na ang mga motorsiklo nga makababag gayud sa agianan sa mga tawo diha sa aseras, alsahon gayud sa mga sakop sa CITOM ug dad-on sa impounding area.

Samtang kadtong mga sakyanan nga masakpang ipataka lang pag-parking sa mga aseras i-clamp sa mga sakop sa CITOM aron pagsiguro nga ang mga hingtungdang motorista makabayad g’yud og multa.

Ang ordinansa sa dakbayan sa Sugbo naglatid nga ang mga tag-iya og sakyanan, apil ang motorsiklo, mobayad gayud og P20 sa matag takna nga pag-parking nila sa gideklarar nga parking area.  (Rene U. Borromeo)

Color coding wala tahura sa mga drayber

Giyam-iran lang sa mga drayber og traysikol sa dakbayan sa Mandaue ang tinguha unta sa Traffic Enforcement Agency of Mandaue (TEAM) nga nagdili kanila pagbiyahe sa bisan asa nga lugar sa siyudad.

Gusto unta sa mga opisyal sa Mandaue nga ipatuman ang “color coding” ngadto sa mga traysikol aron mobiyahe lang sila basi sa rota nga gilatid kanila sa TEAM. Ang Mandaue City Council mihimo’g resolusyon nga magpatuman og color coding sa biyahe sa mga traysikol base sa rekomendasyon sa kadagkoan sa TEAM.

Si Edwin Ermac nga maoy executive officer sa TEAM miingon nga gusto unta nila nga kadtong mga traysikol nga adunay pintal nga puti sa iyang side car adto lang mobiyahe sa Barangay Looc ug Cambaro.

Kadtong mga traysikol nga gipintalan og blue ang side car tugotan lang unta nga makapamasahero sa Barangay Opao ug Alang-Alang gikan sa Barangay Centro.

Matud ni Ermac nga nahukman nila nga kontrolahon ang biyahe sa mga traysikol aron pagsulbad sa problema sa trapiko kay ang mga traysikol magpataka na lang sa pagbiyahe bisan asa nga gusto sa drayber.

Si Ermac miingon nga kusganong gisupak sa mga tag-iya ug drayber sa mga traysikol ang color coding kay nakasupak kini sa ordinansa sa Mandaue.

Nakalimot si Ermac ug ubang opisyal nga ang dakbayan sa Mandaue aduna diay ordinansa nga nagtugot sa mga traysikol nga mobiyahe bisan asa nga dapit sa tibuok dakbayan.

Matud ni Ermac nga gitun-an nila karon ang posible nga paghimo’g kausaban sa mao nga ordinansa aron hingpit nga mapatuman ang color coding sa mga traysikol. (BANAT NEWS)