Mama gikulata gilugos sa anak

CEBU, Philippines - Usa ka 54-anyos nga inahan ang mipasaka og kasong pagpanglugos batok sa 31-anyos niyang anak nga fish vendor nga giingong mikulata kaniya una pa siya niini gilugos niadtong nakalabay’ng adlaw nga Lunes.

Si Senior Police Officer 4 Noel Agurang mibutyag nga ang pagpanglugos nahitabo sa Barangay San Roque sa lungsod sa Baclayon.

Wa hinuon ibutyag sa kapolisan ang mga pangalan sa biktima ug sa suspek apan gidudahang nagumon sa illegal nga drugas ang suspek atol sa paglugos niini sa iyang kaugalingong inahan.

Matud pa sa imbestigasyon, ang inahan naabot sa ilang balay pasado ala-una na sa hapon gikan naghatud sa lubong sa igsuon niining namatay. Gikatahong gimandoan siya sa anak nga pakaligoon, butang nga iyaha  usab gituman.

Apan human kini nakaligo, nakugang ang biktima nga gipangsirad-an sa suspek ang mga pultahan ug mga bintana hinungdan nga misuway siya og ikyas apan gikulata hinuon kini sa anak ug pagkahuman gilugos.

Nakahigayon hinuon siya og ikyas gikan sa balay ug nakapangayo og tabang sa usa pa niya ka anak nga kaluha sa suspek kinsa daling miadto sa ilang balay apan nakurat usab kay ang suspek  naabtan niining padung nang maghikog pinaagi sa pagbitik sa iyang liog gamit ang pisi nga gihikot sa ibabaw nga bahin sa ilang balay.

Ang suspek kinsa gidala sa presinto wala magtingogtingog sa kapolisan ug bisan na sa iyang mga kaparyentihan.

Ang amahan sa suspek hangtud ning pagbalita wala makatoo sa nahitabong eskandalo sa ilang pamilya apan mipadayag kining andam siya mobarog batok sa iyang anak.

Ang barangay kapitan sa San Roque nga si Barangay Captain Lea Locot  mibutyag sa The Freeman (igsuong pamantalaan sa Banat News) nga nakugang gyud ang ilang barangay sa maong hitabo. 

Wa hinuon mokompirmar ang kapitan sa report sa mga lokal nga tigbalita kabahin sa giingong pagkulata sa suspek sa iyang asawa niadtong Domingo sa gabii tungod kay wala kini makighilawas kaniya. (BANAT NEWS)