Kapin 100 ka balay demolison

CEBU, Philippines - Kapin sa usa ka gatus ka panimalay sa Sitio San Miguel, Barangay Apas dakbayan sa Sugbo ang gikatakda nga panggub-on karong Marso 4 human ang korte miisyu na og Writ of Demolition.

Tungod niini, ang mga hingtungdang lumolupyo uban sa mga opisyal sa Barangay Apas maghimo karong buntag og prayer rally didto sa dapit nga nahimutangan sa ilang panimalay.

Si Apas Barangay Captain Ramil Ayuman miingon nga ilang nahukman atol sa sesyon sa konseho kagahapon nga awhagon si Gobernador Hilario Davide III nga tabangan ang hingtungdang pamilya.

Si Mayor Michael Rama mipadayag ‘sab og tinguha nga motabang ug gimandoan ang Division for the Welfare of Urban Poor (DWUP) ug City Legal Office nga asikasohon ang problema sa mga lumolupyo.

Matud ni Ayuman nga si Judge Pamela Baring-Uy sa Municipal Trial Court in Cities (MTCC) mitugot sa awhag ni Alita Suico Magat nga papahawaon ang mao nga mga tawo nga nagpuyo sa giangkon niya nga yuta.

Ang mao’ng yuta nga gipuy-an sa mga lumolupyo kabahin kini kaniadto sa karaan nga Lahug Airport diin ang hukmanan mihatag na og hukom nga si Magat maoy tag-iya.

Apan matud ni Kapitan Ayuman nga ang Kapitolyo nangangkon usab nga ang kayutaan nga nasakop sa Lot 942 ug Lot 947 gipanag-iya gihapon sa lalawigan sa Sugbo.

Matud ni Ayuman nga ang nahisgutang yuta duol kini sa yuta nga giangkon usab nga iya sa mga Godinez nga gipuy-an gihapon sa daghang mga lumulopyo ug hangtud karon wala pa mapapahawa. (BANAT NEWS)