Suspek sa cyber porn mihimakak

CEBU, Philippines - Gihimakak sa duha ka babaye nga nasikop sa kapolisan nga nalambigit sa operasyon sa cyberpornography sa Barangay Guadalupe sa dakbayan sa Sugbo. Samtang ipailawom sa digital forensics ang 35 ka mga computer sets nga nasakmit sa The Filipina Heart Internet Consultant. Gidudahan nga dunay mga ebidensya sa mga malaw-ay nga mga ebidensyang magamit batok sa mga suspek.

Ang Chinese nga si Mei Yi miingon nga wa siya’y kalambigitan sa gipasangil kaniya ug matud pa niini nga nagpuyo lang siya sa maong balay. Miingon si Yi nga una siyang miari sa Sugbo niadtong Nobiyembre 13, 2012 tungod kay giimbitar siya sa usa ka taga Hong Kong nga magtukod og studio.

Apan matud pa niini nga igo lang siya nga mitudlo sa mga empleyado sa maong kompanya sa ilang buhaton.

Giangkon hinuon niya nga nagpuyo siya sa maong balay ug siya ang in-charge sa pagkupot sa kwarta sa maong kompanya, apan wala siya motug-an kun si kinsa ang iyang agalon.

Matud pa niini nga mipuyo siya sa Sugbo tungod kay nagtuo siya nga mas maayo alang sa iyang 3-anyos nga anak nga ari magtuon og English sa Sugbo. Samtang si Joy Vitor nga nahinabi sa Banat News miingon nga wala gyud siya’y kalabotan sa maong negosyo igo lang siya nga nagtrabaho sa opisina ug sa balay ni Yi.

“Kanang sinaligan lang bali niya sa sulod para naa siya’y masaligan. Manager magsweldo og P9,000 mao ba na?” matud ni Vitor. Sumala ni Vitor nga nagsugod siya og trabaho sa maong kompanya isip filing clerk apan gipun-an ni Yi ang iyang suweldo tungod kay siya na ang nag-atiman sa balay ug sa anak niini.

Matud pa ni Vitor nga igo lang siyang mamadlong sa mga empleyado kun dunay magbuhat og malaw-ay kay duna silay house rules nga nagdili niini. Apan nahibulong na lang siya nga siya na man hinuon ang giduot nga igo ra man unta siya nga nagtrabaho sa maong kompanya. (/EIM)(BANAT NEWS)