Mga pribadong tawo interesado sa Green Valley Program sa Talisay

CEBU, Philippines - Mga pribadong indibidwal nga nanag-iya og mga bakanteng luna ang mipadayag nga interesado silang moapil sa “Green Valley Program” sa kagamhanan sa siyudad sa Talisay.

Ang GVP program ni Mayor Johnny De los Reyes nagdasig sa mga Talisaynon nga patamnan og mga utanon ug lagutmon ang mga bakanteng luna sa siyudad.

Pipila sa mga job orders sa city hall ang gibutang sa maong programa aron motabang sa pagpananom.

Base sa report sa Public Information Office (PIO) sa siyudad nga dunay mga pribadong tawo nga gustong patamnan og mga utanon ug lagutmon ang ilang mga lote nga wala pa nila gamita.

Kadtong mga pribadong tawo nga moapil sa maong programa hatagan og singko porsiyentong discount sa balayrunon nila sa buhis.

Gusto sa mayor nga mapuslan pa ang mga bakanteng luna ug masiguro nga dunay abundang pagkaon ang siyudad  nga di kinahanglang magsalig sa abot gikan sa ubang lugar.

Gilauman ni Delos Reyes nga kung maabunda sa utanon ug lagutmon ang Talisay daghan na unyang mga komprador nga moanha sa siyudad.

Gani usa sa mga plano sa mayor mao ang pagtukod og usa ka kan-anan nga iya sa siyudad nga ang putahe mga utanon nga makuha gikan sa maong programa.

Si city agriculturist Rene Galado mibutyag nga namalit pa og dugang binhi sa mga utanon ug lagutmon ngadto sa ubang mga lugar. (/EIM)(BANAT NEWS)