Sunog miulbo atol sa bagyo
CEBU, Philippines - Duha ka sunog miigo sa managlahi nga dapit sa dakbayan sa Sugbo atol nga mikuso-kuso ang bagyo’ng Basyang kaniadtong Biyernes sa gabii.
Nagpasinguwan ang mga bombero pagresponde sa sunog nga miulbo sa usa ka balay didto sa Sitio Panchang, barangay Inayawan dihang hapit na motunga’ng gabii.
Matud ni Fire Investigator Christopher Orbiso sa Cebu City Fire Station nga ang sunog didto miulbo sa pinuy-anan ni Cresencia Soriano.
Napawong ang sunog paglabay sa 20 minutos ug wala makatabok ang kayo sa kabalayan sa mga silingan ni Soriano. Gisuta pa kun unsay hinungdan sa sunog.
Mga bombero miresponde usab sa dalan Carlock, Barangay Sawang Calero kay nagsiga-siga ang alambre sa kuryente sa Visayan Electric Company (VECO).
Si FO3 Ramon Molina miingon nga may lain ‘sab nga poste sa kuryente sa Barangay Talamban ang girespondehan sa mga bombero kay gituohang na-short circuit tungod sa uwan. (BANAT NEWS)
- Latest
