Upat ka ‘wanted’ nadakpan
CEBU, Philippines - Gidakop sa kapolisan sa dakbayan sa Lapu-Lapu ang upat ka tawo nga naglakip sa tulo ka managsuon nga dugay na nga gipangita kay nag-atubang og kaso nga pagpangawat, pagpanulis ug pagsuway pagpatay sa ilang mga biktima.
Ang gibilanggo karon sa Lapu-Lapu City Jail mao sila si Junie Baring, 33, ug ang tulo ka magsuon nga sila si Arnel, 26, Arleigh, 19, ug Roy, 18, pulos bansagon og Ecoy, mga ulitawo ug taga Sitio Soong, Barangay Mactan.
Gidakop sila sa kapolisan nga sakop sa Presento-2 sa Lapu-Lapu City Police Office nga gipangulohan ni Chief Inspector Conrado Manatad nga nagbase sa Barangay Pusok.
Ang gibasehan sa kapolisan pagdakop sa upat ka suspek mao ang warrant of arrest nga giluwatan ni Regional Trial Court (RTC) Branch 54 Judge Ann Marie Melitante.
Matud ni PO2 Eric Punda nga si Baring, nga maoy unang nadakpan, nag-atubang og kaso nga Theft ug ang huwes mirekomendar og pyansa nga P10,000.
Si Arnel Ecoy gikiha og frustrated murder, ang iyang manghod nga sila si Arliegh ug Roy nag-atubang usab og kaso nga robbery. Wala makatug-an si PO2 Punda kun pila ang pyansa nila ni Arliegh ug Roy.
Si PO2 Riel Palahang miingon nga una nila nga nadakpan si Baring didto sa Mactan Proper pasado alas 8 sa gabii niadtong Biyernes ug taud-taud nadakpan usab ang tulo didto sa Sitio Soong sa mao gihapong barangay. (BANAT NEWS)
- Latest
