Gatosan ka pamilya namakwit kay nahadlok sa storm surge

CEBU, Philippines -  Gatosan ka mga pamilya ang namakwit gikan sa ilang mga balay tungod sa pagsaka sa tubig diha sa ilang mga dapit dinala sa bagyong Basyang kagabii sumala pa sa Regional Disaster Risk Reduction Management Council 7.

Ang RDRRMC report nagkanayon nga sa Cebu City, 500 ka pamilya gikan sa barangay Pasil ang mibakwit ngadto sa Pasil gymnasium; duha  sa Barangay Tisa, 30 sa Mabolo, usa sa Pit-os, 20 sa Talamban, tulo sa Inayawan ug 100 ka mga tawo ang mibakwit ug nipasilong sa buhatan sa Department of Engineering and Public Works diha sa South Road Properties.

Sa lungsod sa Minglanilla, 120 ka pamilya sa barangay Calajoan ug Tulay ang mibakwit sa Minglanilla Sports Complex.

Upat ka pamilya usab ang mibakwit sa siyudad sa Carcar ug nipasilong sa Carcar City Sports Complex.

Samtang sa San Fernando, 27 ka pamilya gikan sa barangay Pitalo, 18 gikan sa North Poblacion ug 20 ka pamilya gikan sa barangay South Poblacion ang mihiklin sa San Fernando National High School. Mokabat usab sa 61 ka pamilya gikan sa barangay San Roque, Dumlog, ug Tanke nga pulos coastal barangays ang nibakwit padung sa ilang mga barangay halls matud pa ni Supt. Resty Santos, hepe sa Talisay City Police Station.

Si Vincie Monterde, Public Information Officer sa Talisay ug hepe sa City Disaster Management and Risk Reduction Council mibutyag sa Banat News nga gimando daan ni Mayor Johnny Delos Reyes ang pagrekorida uban sa sakop sa kabomberohan sa  barangay Pooc, Biasong, Dumlog, Poblacion, Cansojong ug Tanke. Usa ka PO1 Janice Bas Deiparine nga sakop sa Talisay City Police Station ang nalandig sa tambalanan human natabas ang iyang batiis sa natumba nga kural nga sin atol na sa iyang pag-uli gikan ni-duty human molabay ang bagyo.   

Sa siyudad sa Mandaue, gihakot sa mga sakop sa Accident Control Emergency Response Team (ACERT) ang 120 ka pamilya nga nagpuyo sa daplin sa kadagatan sa barangay Looc tungod sa kabalaka sa  storm surge sa miaging gabii ug gidala sila sa Mandaue City Central School sa barangay Centro.

Namakwit usab ang 21 ka pamilya sa barangay Cubacub nga nakamatikod sa pagtubo sa tubig sa Butuanon River.

Sa lungsod sa Asturias, si PO3 Josephus Montesclaros sa kapolisan sa maong lungsod mibutyag sa Banat News nga 40 ka mga pamilya ang mibakwit gikan sa barangay Poblacion ug Looc Norte. Gipaabot pa nila kun pila ka pamilya ang apektado sa barangay Sta. Lucia, Bago, Langub ug Lunas apan nakadawat sila og report nga dunay namakwit tungod sa pagsaka sa tubig sa mga sapa ug sa storm surge.

Si Kagawad Josias Peñalosa sa Poblacion mibutyag sa Banat News  nga namakwit ang mga residente kay mitubo ang tubig sa sapa sa sitio Tapon. Matud ni Lt. Jim Alagao ang tigpamaba sa Central Command ang mga kasundalohan sa 501st Special Forces Team nagpahigayon na og clearing operations sa mga natumbang mga kahoy sa kadalanan ug sa landslide sa barangay Bago ug New Bago sa samang lungsod. Sa sitio Buli sa barangay Langub, walo ka baka, pito ka kanding ug duha ka kabaw ang nangalumos.

Presko pa sa huna-huna sa publiko ang pagbanlas sa siyudad sa Tacloban dihang gikusokuso sa super typhoon Yolanda ang Kabisay-an niadtong Nobiyembre 8, 2013. Sagad sa rason sa mga namakwit nabalaka sa ilang kaluwasan tungod sa hulga sa “storm surge” nga mamugna sa kusog nga hangin sa bagyong Basyang.(Brenda Batuto, Bryner Diaz ug Romeo Limpangog/EIM)  (BANAT NEWS)