Mga molupyo sa Apas nabalakang magka – cancer

CEBU, Philippines - Daghang lumulopyo sa usa ka sitio sa Barangay Apas nangahadlok karon nga matakboyan sila’g sakit nga cancer ug mangamatay tungod sa pag-operate sa  usa ka telecommunications company og duha ka cell site tower sa ilang lugar.

Ang mga lumulopyo nga sakop sa Calvary Hills Apas Residents Organization (CHARO) nga gipangulohan ni Porponio Lapa Jr. miingon nga duna nay iyang mga silingan nga nasakit og cancer ug namatay.

Matud ni Lapa nga nabalaka gyud ang iyang mga sakop nga tungod sa grabe’ng radiation gikan sa cell site tower makamugna kini og sakit ngadto kanila. Gusto sa mao nga mga lumulopyo nga kuhaon sa maong kompanya ang duha ka cell site tower sa Sitio Calvary nga nahimutang sa bungtod nga bahin sa Barangay Apas.

Kaniadtong unang semana sa buwan sa Enero ang mga hingtungdang lumulopyo mipirma og petisyon ug ilang gipadala sa National Telecommunications Commission (NTC) aron mandoan ang maong kompanya nga kuhaon sa ilang dapit ang tower.

Ang mga opisyal sa barangay Apas nga gipangulohan ni Kapitan Ramil Ayuman miawhag na sa Department of Health (DOH) nga hatagan sila og katin-awan kun makadaut  ba gyud sa panglawas sa mga tawo nga nagpuyo duol sa cell sites.

Ang Cebu City Council miawhag sa mga sakop sa Committee on Utilities nga moapil paghimo og pagtagad sa reklamo sa mga taga Sitio Calvary sa Barangay Apas.

Matud ni Kapitan Ayuman nga ang mao nga cell sites natukod nga dili pa siya ang kapitan sa barangay. (/EIM)(BANAT NEWS)