Bise mayor maoy target sa hitmen

CEBU, Philippines - Ang bise mayor sa lungsod sa Asturias nga si Joel Dumdum miangkon nga siya maoy target sa  giingong “hitmen” nga na-neutralized sa kapolisan sa nakalabay’ng Huwebes nga miresulta sa kamatayon sa usa ug pagkasikop sa giingong lider niini.  Ang gitumbok nga lider sa grupo mao si Jonathan Rubi kinsa nalandig sa tambalanan human napusilan sa mga sakop sa Provincial Intelligence  Branch ug Anti-Kidnapping Group- Visayas Field Office sa kapolisan.

“Ako gyu’y target, niya nalipay ko at least duna nay 90% nga kasulbaran, hinaot nga motug-an sila nga kinsay nagpaluyo ani,” sumala ni Dumdum.

Mapasalamaton si Dumdum ni Provincial Director Noel Gillamac tungod sa daling aksyon niini.

“Pasalamat kaayo ko kay at least one week nasulbad ang tanan,” sumala pa ni Dumdum.

Wa gisalikway ni Gillamac nga may kalambigitan sa politika ang maong plano nga pagpatay kang Dumdum.

“Posible nga naay kalambigitan ni sa politika, after sa election, ang vice-mayor nangayo na og tabang diri namo kay nakadawat na siya og threat,” sumala ni Gillamac.

Matud ni Gillamac nga ang namatay nga si Edgar Escalante (dili ang reporter sa  ABS-CBN Central Visayas) ug si Jonathan Rubi dunay tulo ka mga kauban nga maoy mga “spotters” o ang tig-espiya sa kalihokan sa ilang target.

Sumala pa ni Dumdum nadakpan na ang tulo kagahapon sa hapon, ang usa kanila babaye.

“Ang suspect nisulti na sa ngalan ug location sa misugo niya apan dili kini mao ang mastermind,” dugang ni Gillamac.

Tungod niini gipalapdan pa sa kapolisan ang  imbestigasyon kun kinsa gyud ang nagpaluyo sa pagsulay og kutlo sa kinabuhi ni Dumdum. (/EIM)(BANAT NEWS)