Testigo sa kawat gitagod og tigbas
CEBU, Philippines - Usa ka babayeng mitestigo batok sa silingan nga gireklamong nangawat og lubi, gitagod og tigbas patay diha sa barangay Lingigon sa lungsod sa Argao sa miaging adlaw.
Naputos og samad tinigbasan sa kalawasan si Armanda Embudo, molupyo sa nahisgotan nga lugar.Ang gitumbok nga suspetsado naila nga si Roel Gomez, 28, silingan ra sab sa biktima.
Sumala pa ni PO3 Benjamin Gerozaga si Embudo giatangan sa suspek nga nagdala og sundang, matud pa daan nang giplanohan sa suspetsado nga atakihon ang biktima tungod kay misaksi kini batok kaniya. Ang biktima mitestigo sa husay sa barangay nga si Gomez ang nangawat sa mga lubi sa ilang silingan.
Matud pa nga katunga sa liog ang naabis ug gituohan nga lunggoan unta kini sa suspetsado sa iyang liog, apan dunay mga tawong nangabot maong gibiyaan na lang kini.
Ang mga saksi nga nakakita sa maong panghitabo daling midala sa biktima ngadto sa Isidro Kintanar Memorial Medical Center apan gideklarar na kini nga dead on arrival. Samtang ang suspek dali sab nga misibat human sa maong hitabo ug padayon pang gipangita sa kapolisan. (BANAT NEWS)
- Latest
