20 job orders sa siyudad wa sweldohi

CEBU, Philippines - Adunay 20 ka “job order” nga mga kawani sa Cebu City Hall nga gidestino isip gwardya didto sa Pasil Fish Port ug Community Scouts ang wala masweldohi gikan pa kaniadtong Abril sa miaging tuig hangtud karon.

Apan nasayran sa mga konsehal sa dakbayan sa Sugbo nga kining maong mga kawani walay appointment papers nga nagtugot kanila sa pagpadayon pagtrabaho.

Matud ni Graciano Lauron, ang gisaligan ni Mayor Michael Rama sa pagdumala sa nahisgutang mga job order nga kawani nga bisan og walay sweldo ang mao nga mga tawo nagpadayon sa pagserbisyo.

Si Lauron miingon nga sa nanglabay nga katuigan ang sweldo sa mao nga mga job order nga kawani gikuha gikan sa sobra nga budget sa General Service Office (GSO).

Matud ni Lauron nga gisukip unta nila sa Supplemental Budget ang gikinahanglan nga kantidad alang sa sweldo sa mao nga mga JO’s apan wala kini maaprobahi sa City Council.  Si Konsehal Margot Osmeña, tsirman sa Committee on Budget and Finance, mipasabot nga ang budget nga gipangayo wala maaprobahi kay wala kini suportahi sa ngalan sa mao nga mga JO’s.

Matud ni Osmeña nga nasumiter ang ngalan sa mao nga mga JO’s ngadto sa City Council apan human na sa pagpreparar sa Supplemental Budget.

Tungod niini, ang City Council kagahapon nagmugna og Ad hoc Committee nga gilangkoban og tulo ka konsehal nga motan-aw sa sitwasyon sa mga JO’s sa lainlaing departamento sa City Hall. (BANAT NEWS)