Terminal utangan og P2M sa siyudad

CEBU, Philippines - Ang North Consolidated Transport Terminal utangan sa syudad sa Sugbo og kapin P2 milyones gumikan sa tax delinquencies sukad pa niadtong 2011.

Ang OIC City Treasurer sa siyudad nga si Diwa Cuevas mipahibalo sa konseho niadtong Enero  15 kabahin sa P2,032,908.97 milyones nga “business taxes and fees” nga utang sa maong terminal.

Ang konseho mi-refer usab sa maong request ngadto sa committees on utilities, laws ug transportation alang sa dugang rekomendasyon. 

Si Cuevas mihangyo sa city attorney nga mohimo og “legal action” batok sa terminal management pinaagi sa permitee nga si Felix Villaceran aron mapadali ang pagbayad sa “tax deficiencies.”  “Gi -inform ra namo ang city attorney for whatever legal action ilang buhaton,” sumala ni Cuevas.

Kahinumduman nga niadtong Oktubre 17, 2011 ang kanhi city attorney Joseph Bernaldez nagpadala og final demand letter sa management apan sumala ni Cuevas wa gyud kini mosanong mao nga midako ang ilang balayrunon.

Ang buhatan sa Treasurer nagpadala og Notice of Assessment niadtong Marso 2, 2011 ug final demand niadtong Hulyo 15, 2012 apan wala gihapon mosanong ang terminal.

Sa pakighinabi sa Banat News kang Cuevas, matud niya nga ning bag-ohay nga mibayad og “partial”  ang management  kay mi- renew sila og business permit. (BANAT NEWS)