Amang napusilan angol

CEBU, Philippines - Nalandig  sa tambalanan  ang amang human kini pusila sa wala hiilhing lalaki  didto   sa sitio Manang, barangay Tabunok, dakbayan sa Talisay,  kagahapon  sa kaadlawon.

Ang biktima  mao si Boy Mier alyas Amang, 46, residente sa barangay Lawaan II, dakbayan sa Talisay.   

Samdan   ang  biktima   sa tiyan busa  dali  kining  gihatud  ngadto   sa Talisay City District Hospital apan  gibalhin ngadto sa Vicente Sotto Memorial Medical Center sa dakbayan sa Sugbo.

Sa imbestigasyon sa kapolisan nasuta nga si Mier naglakaw  sa ilawom sa tulay sa Mananga paingon sa  ilang  balay  dihang usa ka wala hiilhing lalaki kalit lang  mipusil   kaniya.

Si Inspector Rogene Fudotan  sa Talisay  City  Police  Office mibutyag sa Banat News  nga naglisud sila sa pagkuha og uban pang detalye bahin sa hitabo tungod kay amang ang biktima ug dili usab kini kahibalong mosuwat .

Matud ni Fudotan nga ang kapuyo usab sa biktima amang  usab  ug  lakip  ang nag-abang  sa ilang balay amang gihapon. (BANAT NEWS)