CEBU, Philippines - Giaprobahan kagahapon sa konseho sa dakbayan sa Talisay ang pag-hire sa anak ni Mayor Johnny De los Reyes isip consultant ug pharmacist sa indigent pharmacy sa siyudad.
Ang maong lakang nunot sa legal opinyon ni Talisay City Legal Officer Alfredo Sipalay nga nagkanayong walay legal obstacle nga naglambigit sa nepotism ang pag-hire sa anak sa mayor nga si Johnson Joy R. Pagunsan isip consultant.
Ang approval sa pag-hire kang Pagunsan gipugngan una sa konseho sa milabay’ng semana tungod kay nangayo pa sila og legal opinion gikan sa city legal officer kung dili ba kini makonsiderar nga nepotism.
Human sa giluwatang legal opinion ni Sipalay, si city councilor Edward Alesna kinsa maoy nagpaluyo sa resolusyon ug mao usab ang nagpugong niini sa sayo pa, nagkanayon nga mosuporta siya sa pag-hire kang Pagunsan.
Si Sipalay sa iyang bahin, mipasabot nga ang pag-hire og close relatives isip confidential employees o consultant, naandan kining gibuhat bisan pa sa mga Huwes sa Korte Suprema ug Court of Appeals.
Si Pagunsan kinsa usa ka license pharmacist ang gikuha sa syudad isip consultant sulod sa unom ka buwan ug siya maoy moatiman sa indigent pharmacy sa city hall.
Si Sipalay mitumbok nga si kanhi kongresista Pablo Garcia dihang gobernador pa kini sa lalawigan sa Sugbo niadtong tuig 1995-2004 mikuha kini sa iyang anak nga si Gwendolyn Garcia ug Nelson Garcia isip mga consultant. Matud usab ni Sipalay nga dihang si Kongresista Gwendolyn Garcia mao nay gobernador gi-hire usab niya ang iyang mga igsuon nga sila si Pablo John ug Byron isip mga consultant.
Dugang pa ni Sipalay nga exempted sa operation sa rules sa nepotism ang mga gikuha nga kawani ubos sa confidential capacity, magtutudlo, physician, ug sakop sa Armadong Kusog sa Pilipinas.
Ang mga consultant walay labot sa rules sa nepotism “consultants are among those exempted from the rules of nepotismâ€, matud ni Sipalay.
Nunot niini, si De los Reyes mihangop sa desisyon sa konseho ug matud niini nga iyang anak temporaryo niyang kuhaon isip consultant/pharmacist hangtud nga ang siyudad makakita na og permanenteng pharmacist.
Sa milabay’ng adlaw ang mayor temporaryo una nga mipahunong sa operasyon sa indigent pharmacy samtang wala pa aprobahi sa konseho ang pagkuha og consultant pharmacist. (BANAT NEWS)