Milungkab sa condo unit sa doctor wala pa matumbok
CEBU, Philippines - Blangko pa gihapon ang kapolisan kun kinsa ang milungkab sa condo unit sa usa ka doktor sa Nivel Hills sa barangay Busay sa miaging hapon.
Matud pa ni PO3 Rommer Varona, Chief Investigator sa Theft and Robbery Section nga hangtod karon wa pa silay lead kun kinsa ang naglungkab sa condo unit ni Dr. Lizbeth Regner.
Apan sumala pa ni Varona nga naghulat pa sila sa abogado ni Dr. Regner kun unsay ilang aksyon nga buhaton.
Walay closed-circuit television camera ang maong unit maong naglisod sila pagsuta kun kinsa ang naglungkab niini tungod kay wala pa say mga saksi nga mitumaw.
Matud pa nga gitangtang sa suspetsado ug giilisan ang door knob sa kwarto sa biktima.
Nakuha sa wala mailhing suspetsado ang salapi nga mokabat og P200 mil, $1,000, Rolex nga relo nga mokabat og P400 mil, alahas nga mobalor og P800 mil, usa ka laptop nga mobalor og P50 mil, digicam nga mobalor og P5 mil.
Nakuha sab sa wa mailhing kawatan ang lisensya sa revolver sa biktima ug ang driver’s license niini, titulo sa yuta niini, mga yawi sa condo, HSBC Mastercard, ug uban pang dokumento. Mobalor og P1.5 milyones ang tanang nakuha sa wala pa mailhing kawatan lakip na sa mga butang ug salapi nga iyang nakuha. (/EIM)(BANAT NEWS)
- Latest
