Linemen ug mediamen gibansay og survival skills

CEBU, Philippines - Tungod kay ang mga sakop sa media ug mga linemen apil sa labing unang makaresponde sa mga alarma sama sa mga linog ug sa bagyong Yolanda sa milabay’ng tuig, pipila kanila ang nakasinati og kagutom ug nag-antos sama sa mga nasinati sa mga survivors.

Aron di na kini masubli pa, ang Visayan Electric Company kinsa mipadala usab og mga linemen sa mga disaster-hit areas sa nasud aron motabang, milusad kini og survival skills training niadtong Biyernes ug Sabado sa barangay Sirao, Cebu City.

“Nakakita man ko after sa earthquake and Yolanda, kamo murag naglisod unsaon pag-adapt, unsaon pag-survive in an environment nga way tubig, kuryente ug sakyanan. This is why we thought of this,” matud pa ni Veco spokesperson Teresa Ganzo.

Dunay 24 ka sakop ka tawo, siyam niini mga mediamen ug ang uban mga Veco linemen ang gipailawom sa surpresang training diin kadaghanan kanila wala’y ideya kun unsa.

Ang mga mediamen gitug-anan nga dad-on ang sagad nilang mga dad-unon kun mo-cover og disaster aftermath. Gibahin sila ikalima  ug gipatukod og open tent gamit ang bisan unsang materyales nga anaa sa palibot. Gihatagan lang sila og usa ka kilong bugas, duha ka itlog, usa ka carrot, duha ka sibuyas, duha ka ahos ug seasoning. Gihatagan usab sila og duha ka condoms nga maoy ilang butangan og tubig.

Ang lima ka gagmay nga kampo gikatag sa kabukiran sa Sirao  nga diin pwerteng bugnawa sa panahon ilabi na kun gabii. Usa sa mga trainers nga si Louie Domingo, gikan sa Emergency Research Center, Inc (ERC), miingon nga ang mga partisipante kinahanglang makasuway sa tanang element sa kinaiyahan aron sila makat-on sa pahiluna sa ilang kaugalingon sa bisan unsang sitwasyon. (BANAT NEWS)