Wanted nakaipsot

CEBU, Philippines - Nasikop sa kapolisan ang usa ka lalaki nga nakuhaan og shabu samtang nakaipsot ang usa ka lalaki nga wanted sa managlahing operasyon sa lungsod sa Liloan sa miaging adlaw. Ang nakaipsot nga dunay kasong attempted homicide sa barangay San Vicente sa lungsod sa Liloan giila nga si Axel Pan alyas Bungi. Sila si PO1 Allen Lecciones kuyog sa tanod nga si Roland Sasing moaresto unta ni Pan pinasikad sa warrant of arrest apan nakabantay kini sa mga polis ug miikyas.

Matud pa nga samtang midagan ang biktima gilabay niini ang iyang beltbag sa kalibonan nga sa paghiling sa mga polis  duna kini sud nga unom ka paketeng shabu, usa ka kalibre .22 nga BLack Widow nga may tulo ka bala ug usa ka cellphone.

Samtang nasikop si Nino Pepito, molupyo sa Purok Mahogany, Barangay Tayud sa Liloan. Matud pa nga si Pepito nasakpan sa akto ni SPO3 Octavio Dela Paz nga nagdala og lima ka paketeng shabu atol sa pagpatrolya niini sa barangay Tayud.

Daling gidala sa Liloan Police Station ug natanggong karon sa karsel sa maong estasyon samtang giandam pa ang kaso nga gipasaka batok kaniya. (BANAT NEWS)