P1.5M nadala sa kawatan

CEBU, Philippines - Kapin sa usa usa ka milyon ang nakuha sa wala mailhing kawatan nga milungkab sa usa ka condo unit sa CITI Light Condominium sa Nivel Hills sa barangay Busay sa dakbayan sa Sugbo pasado ala-una sa miaging hapon.

Ang biktima naila nga si Dr. Lizbeth Regner, 62, molupyo sa nahisgutan nga dapit.

Matud pa nga nadiskubrihan sa biktima nga gilungkab ang iyang condo unit sa ala 1:30 sa miaging kaadlawon busa dali kining mitaho sa kapolisan.

Base sa spot report sa Theft and Robbery Section sa Cebu City Police Office nga sumala sa ocular inspection nga gipangulohan ni SPO4 Ernesto Panaligan nga giguba sa wala mailhing kawatan ang doorknob sa kwarto sa biktima.

Matud pa nga gitangtang sa kawatan ug giilisan ang doorknob sa kwarto sa biktima.

Nakuha ang salapi nga mokabat og P200 mil, $1,000, Rolex nga relo nga mokabat og P400 mil, alahas nga mobalor og P800 mil, usa ka laptop nga mobalor og P50 mil, digicam nga mobalor og P5 mil.

Nakuha sab sa wa mailhing kawatan ang lisensya sa revolver sa biktima ug ang driver’s license niini, titulo sa yuta niini, mga yawe sa condo, HSBC Mastercard, ug uban pang dokumento.

Mobalor og P1.5 milyones ang tanang nakuha sa wala pa mailhing kawatan lakip na sa mga butang ug salapi nga iyang nakuha.

Basi sa imbistigasyon sa kapolisan nga sa wala pa mahitabo ang maong insidente ang anak sa biktima nga si Vergel Regner misulod sa maong condo unit kuyog ang duha niini ka mga anak base sa record sa condo unit.

Busa gipalapdan sa kapolisan ang imbestigasyon sa maong pagpanglungkab  ug daghang anggulo ang ilang gisubay aron masulbad ang maong krimen. (BANAT NEWS)