Leyte gitay-og og unom ka linog

CEBU, Philippines - Unom ka linog ang mitay-og sa managlahing dapit sa Leyte kagahapong adlawa sumala pa sa Philippine Institute of Volcanology and Seismology (PHIVOLCS).

Matud pa sa  PHIVOLCS nga unang miigo ang magnitude 3.3 nga linog sa Kananga, Leyte sa alas 9:36 kagahapon sa buntag. Sunod nga gitay-og sa magnitude 3.2 nga linog mao ang Villaba, Leyte sa alas 10:32 sa buntag.

Gitay-og sab sa magnitude 4.1 nga linog ang Capoocan, Leyte sa alas 10:41 kagahapon sa buntag. Mibalik og tay-og ang Kananga, Leyte alas 11:19 sa buntag nga mitala og magnitude 3.1. Sunod nga gilinog ang Jaro, Leyte sa gikusgon nga magnitude 2.4 sa alas 11:34 sa buntag.

Kataposang natala sa PHIVOLCS mao ang pagtay-og sa Tunga, Leyte alas 2:12 sa hapon kagahapong adlawa.

Sa maong pagtay-og sa yuta wala hinuoy gikataho nga naangol o kabtangan nga naguba. (Bryner Diaz/EIM)  

Lolo patay sa disgrasya

Patay ang usa ka lolo nga angkas sa motor human nabangga ang ilang gisakyan sa laing motor diha sa barangay Media-Poblacion sa lungsod sa Argao sa alas 10:30 sa miaging adlaw.

Ang nakalas naila nga si Joaquin Datuin, 71, nga angkas sa iyang apo nga si Jomari Datuin, 20, pulos taga Mabasa, Argao.

Samtang ang nabanggaan mao ang motor nga gimaneho ni Ramcy Tampoy nga taga Catang, Argao.

Matud pa nga naigo ni Tampoy ang mga Datuin hinungdan sa pagkalukapa sa sa duha ka motor hinungdan nga nakaangkon og kadaut sa kalawasan ang tulo.

Gidala sa Isidro C. Kintanar Memorial Medical Hospital ang tulo apan nagrabihan og maayo ang 71-anyos  nga si Joaquin ug namatay paglabay sa pipila ka oras. (BANAT NEWS)