Tulo angol sa aksidente

CEBU, Philippines - Tulo ang angol lakip na sa usa ka menor sa managlahing disgrasya sa kadalanan sa lalawigan sa Sugbo.

Naangol ang usa ka 6-anyos nga batang lalaki human kini maigo sa manobela sa motor  sa iyang ulo dihang milabang siya sa dalan sa barangay Mangoto sa lungsod sa Pinamungajan.

Ang nakaigo sa maong bata naila nga si  Neil Fetiluna, 21, nga usa ka pumpboy ug molupyo sa samang lugar. Matud pa nga nabalitok ang bata human maigo sa motor ug daling gidala ngadto sa tambalanan.

Samtang daling misibat ang suspetsado human sa maong hitabo apan nasikop ra kini dayon sa kapolisan sa follow-up operation nga gipahigayon niini.

Sumala pa nga wala maglisod ang kapolisan sa pagpangita sa suspetsado sanglit nailhan man siya nga siya ang nakabangga sa biktima.

Samtang duha ka tawo ug usa ka trisikad ang gidaro sa motor nga gimaneho sa usa ka menor sa barangay Palanas sa lungsod sa Alcantara pasado alas-6 sa miaging gabii.

Base sa imbestigasyon sa kapolisan nga kusog kaayo mipadagan ang suspetsado sa iyang motor ug nawad-an siya og kontrol niini hinungdan nga nabanggaan niya ang duha ka tawo. Ang naangol naila nga sila si Eduardo Tejas, 48, taga Lawaan Alcantara, ug si Juvinal Dorig, 52, taga Candabong Alcantara.

Daling gidala sa Badian District Hospital ang mga biktima samtang ang suspetsado dali ra sab nga misibat human sa maong hitabo.

Ang motor sa biktima ug ang trisikad nga nabanggaan gidala sa buhatan sa kapolisan ug kasamtangan nga gi-impound. (BANAT NEWS)