Mga tag-iya’g hotel mireklamo batok sa guba nga karsada

CEBU, Philippines - Pormal nga misang-at og reklamo  sa DPWH ug LGU sa dakbayan sa Lapu-Lapu ang mga dagkong hotel ug resort sa Brgy. Marigondon  gumikan sa kaguba sa  ilang  karsada hinungdan sa mimenus sa ilang kinitaan.

Si Lapu-Lapu OIC City Engineer Allan Pedrigal nga maoy nakadawat sa maong reklamo mipadala  og komunikasyon kang DPWH 7 Regional Director Ador Canlas kalabot sa maong problema.

Kini  tungod  kay ang dalan nga gikan sa Brgy. Marigondon ngadto na sa Brgy. Mactan nalakip  sa proyekto ni Pres. Benigno "Noynoy" Aquino III sa gipalapdan niini  nga  circumferential road sa dakbayan sa Lapu-Lapu.

Samtang  ang  nagtukod  usab sa maong proyekto mao ang DPWH  nga  gi-sub-contract  sa  Oaminal Construction ug  Venry Construction.

Si Mayor Radaza  kinsa nakigkita  sa kontractor sa  maong  proyekto  mipadayag nga posibleng   unya  pa  sa Marso  makompleto ang maong proyekto gumikan sa dautang panahon ug kalamidad nga nasinati sa milabay’ng tuig.

      Ang maong proyekto gisugdan niadtong  Hulyo 2013 ug gitakda   unta  nga  humanon  sa milabay’ng Disyembre 2013.

Apan  nasuta  nga  niadtong  buwan  sa Disyembre  60 porsento pa lamang ang nahuman sa maong kontractor ug nagpabiling guba pa ang dalan nga nagkutay sa mga dagkong hotel sa maong dapit.

Gumikan niini nahiagum  og  mga  saway  sa social media ug sa mga turista ang  kagamhanan  sa Lapu-Lapu  gumikan sa wa  magkadimao  nga  mga  kadalanan  niini. 

Matud pa ni Mayor Radaza   nga  angay  nga  dublihon  ang   oras ug panahon   nga  ibubo  sa  kontraktor   aron mahuman  dayon  ang  maong  proyekto.

Midugang  si Radaza nga  ang  pagkabara  sa trabaho, nakahatag sa  dili maayong epekto sa turismo sa dakbayan sa Lapu-Lapu nga maoy usa sa gisaligan sa siyudad sa natad sa ekonomiya.

Matud pa ni Hembler Mendoza ang City Tourism Officer sa dakbayan sa Lapu-Lapu  nga 78% ra ang "occupancy rate" sa mga hotel ug resort sa dakbayan sa Lapu-Lapu sud sa 13 ka adlaw sa wala pa isaulog ang tinuig nga Sinulog Festival sa dakbayan sa Sugbo. (BANAT NEWS)