Radaza mosagop sa mga membro sa 4PS

CEBU, Philippines - Gipangandaman ni Lapu-Lapu City Mayor Paz Radaza ang kaugmaon sa mga miyembro sa Pantawid Pangkabuhayan ng Pamilyang Pilipino  (4Ps) diin ang  unang  batch  sa  mga benepisyaryo napupos sa miaging  Disyembre.   

 Matud pa ni Mayor Radaza   nga kinahanglan nga sustinihan sa lokal nga kagamhanan sa dakbayan sa Lapu-Lapu ang paghatag og panginabuhian sa mga sakop sa 4Ps  sa unang batch duha ka tuig gikan karon.     

Atol sa iyang pakigtagbo sa mga sakop sa DSWS sa dakbayan sa Lapu-Lapu, iyang gitahasan ang maong buhatan sa pagpangandam  sa paghatag og dugang livelihood program sa mga miyembro sa 4Ps nga matangtang sa maong programa gikan  sa DSWD.      

Ang Lapu-Lapu City adunay 6,000 ka mga miyembro sa 4Ps nga  gitabangan  sa  DSWD sulod sa lima ka tuig. Kasagaran  kanila may mga  anak  nga  nagtungha  pa ug  karong  wala  na  sila’y  tabang  gikan sa DSWD, maglisud  sila  sa pagbarug sa ilang  kaugalingon.

Ang ubang mga  anak  nga nagtungha  pa  gustong  mopadayon  sa  ilang  pag-eskuyla bisan  kun  napupos  na  ang tabang  sa DSWD  kanila. Apan  gitinguha  ni  Radaza  nga  ipaubos kini sa scholarship program sa siyudad.     

Lakip sa giandam nga livelihood program sa mga 4Ps member mao ang food trade ug dress making sa mga kababayen-an ug mga skilled works alang sa mga kalalakihan.     

 Ang molampus sa maong pagtungha adunay oportunidad  nga  makasulod og  trabaho sa PEZA pinaagi sa rekomendasyon sa kagamhanang lokal sa dakbayan sa Lapu-Lapu. (BANAT NEWS)