Ulay naluto sa sunog namatay sa tambalanan

CEBU, Philippines - Namatay sa tambalanan ang usa ka babaye human kini makaangkon og grabing paso sa iyang lawas sa pagkasunog sa iyang panimalay niadtong Huwebes sa alas 9:30 sa miaging gabii sa sitio Gumamela, barangay Ocoy, sa lungsod sa Sta. Fe. Ang biktima naila nga si Gloria Ilustrisimo, 52, molupyo sa samang lugar.

Base sa imbestigasyon sa kapolisan nga ang biktima natulog na sa sayong kagabhion apan sa wala pa siya matulog nagdagkot kini og katol ug gibutang sa iyang tiilan.

Sumala pa nga posible nga ang katol ang hinungdan sa sunog nga miresulta sa pagkapaso sa lawas sa biktima.

Nakaangkon og second degree burn ang biktima sa iyang dughan ug third degree burns sa iyang ulo ug liog.

Wala na matabang sa mga doktor sa Bantayan District Hospital ang biktima ug gideklarar kini ni Dr. Lee Fua nga patay na sa alas 3:45 niadtong Biyernes.

Samtang nasunog usab ang buhatan sa Boy Scouts of the Philippines nga nahimutang sa barangay Lahug sa dakbayan sa Sugbo kagahapon sa alas 5:55 sa buntag.

Matud pa nga giisa sa first alarm ang maong sunog ug mikabat ang danyos sa P110 mil.

Walay gikatahong naangol sa maong sunog nga gideklarar nga under control alas 6:12 kagahapon sa buntag.

Padayon pa ang kabomberohan sa pag-imbistigar sa hinungdan sa maong sunog. (BANAT NEWS)