Lawis Ledge pabutangan og boya sa Talisay City

CEBU, Philippines - Mga opisyal sa dakbayan sa Talisay mogama og lakang sa pagbutang og mga buya isip temporaryong marka diha sa Lawis Ledge sa may barangay Tanke aron malikayan ang laing aksidente na usab sa kadagatan.

Niadtong Huwebes sa gabii ang Weesam Express 7 nasangad diha sa maong lugar maayo na lang gani kay walay mga naangol sa 160 ka mga pasahero sa nahisgutang fast craft. Usa ka Ivan Gaga, pasahero sa maong fastcraft nga nakahinabi sa DyRC tunga-tunga sa maong sitwasyon mibutyag nga sa pag-abot pa lang sa Weesam 7 sa Ormoc sa miaging adlaw na-late na kini, mao nga alas-3 pasado na sila nakabiya didto.

Apan sa ilang pagsulod sa Mactan Channel nasangad na hinuon sila ug naaberiya og kapin sa duha ka oras. Matud niya unang naabot ang coastguard ug nigamit og usa ka rubberboat alang sa pagbalhin sa mga pasahero ngadto sa ilang barko.

Ang Weesam 8 maoy gikargahan sa mga pasahero aron mahatud sila ngadto sa pantalan diin gipakaon sila sa management subay sa mando sa ilang tagdumala nga si Wahid Abao.

Gibasol sa maong aksidente ang kakusog sa hangin ug bawod maong napadpad ang fastcraft sa mabaw nga bahin sa Lawis Ledge.

Si Konsehal Danny Caballero nga nahinabi sa Banat News kagahapon mibutyag nga si Mayor Johnny De los Reyes miluwat dayon og kamanduan sa pagpadala sa speed boat sa Fishermen Sea and Ecological Care (FISECA) ngadto sa lugar diin masangad ang fastcraft aron makatabang sa pagluwas sa mga pasahero ug tripulante sa vessel kun gikinahanglan.

Plano sa Talisay nga magdestino  og personnel sa FISECA nga mag-monitor sa moagi nga mga barko, karong umaabot Martes mopalabang siya og resolusyon sa pagbutang og mga buya aron giya sa mga barko aron di sila masangad.

Mi-file na og marine protest kagahapon ang kapitan sa Weesam Express 7 human masangad ang maong fast craft sa Lawis Ledge sa miaging gabii.

Matud pa sa maong source nakuha gikan sa pagkasangad niini ang Weesam 7 alas 3:45 kagahapon sa kaadlawon. (/EIM)(BANAT NEWS)