Nahagbong sa klase naghikog

CEBU, Philippines - Naghikog ang usa ka tinun-an sa third year high school tungod sa kahadlok nga kasab-an siya sa iyang ginikanan tungod kay nahagbong kini sa iyang klase pasado alas-6 sa miaging gabii sa sitio Kan-irag, barangay Malubog sa dakbayan sa Sugbo.

Base sa imbestigasyon sa Homicide Section sa Cebu City Police Office nga nadiskubrehan na lang sa inahan sa tinun-an (pangalan gipugngan) nga nagbitay ug wala nay kinabuhi ang iyang anak sulod sa iyang kwarto. Matud pa nga pakig-estoryahan unta sa inahan ang iyang anak tungod kay nakighinabi kaniya ang adviser sa maong tinun-an.

Sumala pa nga nahagbong ang maong tinun-an ug matud sa magtutudlo niini ngadto sa iyang inahan nga posibling mobalik kini sa pag-eskwela sa third year.

Apan mao na lay nakit-an sa inahan nga nagbitay ug naghigot sa habol ang iyang anak. Daling nanawag og tabang ang inahan ug gisulayan sa pagluwas ang anak apan patay na gyud kini.

Sumala pa nga ang tinun-an misugilon pa sa iyang duha ka classmates nga maghikog siya kun makahibalo ang iyang inahan nga nahagbong siya. Way nakita ang kapolisan nga timailhang may foul play sa kamatayon niini. (BANAT NEWS)