Gisaka sa balay gipusil

CEBU, Philippines - Usa ka lalaki ang gipusil samtang natulog sa sulod sa iyang panimalay sa barangay Napo dakbayan sa Carcar sa alas 9:35 sa gabii sa miaging adlaw. Ang biktima giila nga si Coro Navarres, 28,  lumulopyo sa maong dapit kinsa nakaangkon og samad pinusilan sa iyang tiyan.

Base sa imbestigasyon sa Carcar Police Station, kalit nga gisud sa usa ka wala mailhing lalaki ang balay sa biktima ug diretsong mipusil sa biktima nga naghigda na niadtong tungora aron matulog.

Nakuha sa crime scene sa kapulisan sa Carcar Police Station mao ang usa ka live ammunition ug  basiyo sa bala nga kalibre 45 ug  usa ka slug sa wa matino nga kalibre sa armas.

Gidala sa mga silingan ang biktima sa Carcar Provincial Hospital apan tungod sa kapeligro sa iyang kahimtang gibalhin kini sa Vicente Sotto Medical Center.

Sa pagkakaron, padayon gihapon sa pagpangita ang kapulisan sa gikatahapan ug gisubay na ang motibo sa maong krimen. (BANAT NEWS)